B.Tech Transportation Engineering: பிளஸ்-2 முடிச்சாச்சா? - டிரான்ஸ்போர்ட்டேஷன் இன்ஜினியரிங் கோர்ஸ்க்கு இப்போது செம டிமாண்ட்...

நாட்டின் உள்கட்டமைப்பை வடிவமைக்கும் முக்கிய படிப்பு: போக்குவரத்து பொறியியலில் B.Tech படிப்புக்கு அதிகரிக்கும் வரவேற்பு இன்றைய நவீன உலகின் வளர்ச்சிக்கு அடிப்படை ஆதாரமாக விளங்குவது உள்கட்டமைப்பு வசதிகளாகும். குறிப்பாக சாலை, இரயில், விமானம் மற்றும் துறைமுக போக்குவரத்து அமைப்புகள் ஒரு நாட்டின் பொருளாதார வளர்ச்சியை தீர்மானிக்கும் முக்கிய காரணிகளாக பார்க்கப்படுகின்றன. இந்த நிலையில், நாட்டின் போக்குவரத்து கட்டமைப்புகளை திட்டமிட்டு உருவாக்கும் முக்கிய பொறியியல் படிப்பாக B.Tech Transportation Engineering உருவெடுத்து வருகிறது.

 சிவில் இன்ஜினியரிங் துறையின் முக்கிய பிரிவாகக் கருதப்படும் இந்தப் படிப்பு, உலகளாவிய போக்குவரத்து தேவைகளின் காரணமாக தற்போது தனித்துவமான முக்கியத்துவம் பெற்று வருகிறது. சாலைகள், மேம்பாலங்கள், அதிவேக நெடுஞ்சாலைகள், மெட்ரோ ரயில்கள், விமான நிலையங்கள் மற்றும் துறைமுகங்களை திட்டமிடுதல், வடிவமைத்தல், இயக்குதல் மற்றும் பராமரித்தல் ஆகியவற்றை மையமாகக் கொண்டு இந்தப் படிப்பு அமைந்துள்ளது.  உலகம் முழுவதும் ஸ்மார்ட் சிட்டி திட்டங்கள், அதிவேக நெடுஞ்சாலை திட்டங்கள் மற்றும் நகர்ப்புற போக்குவரத்து வசதிகள் வேகமாக வளர்ந்து வரும் நிலையில், போக்குவரத்து பொறியாளர்களுக்கான தேவை நாளுக்கு நாள் அதிகரித்து வருகிறது.  இத்துறையில் பட்டம் பெறும் மாணவர்கள் பொறியாளர்களாக மட்டுமின்றி, திட்ட ஆலோசகர்கள், போக்குவரத்து ஆய்வாளர்கள் மற்றும் ஆராய்ச்சியாளர்களாகவும் பணியாற்றும் வாய்ப்பைப் பெறுகின்றனர். மேலும், வளர்ந்த நாடுகளில் மெட்ரோ ரயில் திட்டங்கள், தன்னாட்சி வாகன தொழில்நுட்பங்கள் மற்றும் செயற்கை நுண்ணறிவு அடிப்படையிலான போக்குவரத்து அமைப்புகள் விரிவடைந்து வருவதால், வெளிநாடுகளிலும் இத்துறை பட்டதாரிகளுக்கு அதிக வேலைவாய்ப்புகள் உருவாகியுள்ளன. 

படிப்பில் சேர தேவையான தகுதிகள் B.Tech Transportation Engineering படிப்பில் சேர விரும்பும் மாணவர்கள் பிளஸ்-2 வகுப்பில் கணிதம், இயற்பியல் மற்றும் வேதியியல் பாடங்களை முதன்மைப் பாடங்களாக எடுத்துப் படித்து தேர்ச்சி பெற்றிருக்க வேண்டும்.  ஐ.ஐ.டி., என்.ஐ.டி. போன்ற தேசிய முக்கியத்துவம் வாய்ந்த கல்வி நிறுவனங்களில் சேர விரும்பும் மாணவர்கள் ஜே.இ.இ. (JEE) நுழைவுத் தேர்வில் தேர்ச்சி பெற வேண்டும். தமிழகத்தில் அண்ணா பல்கலைக்கழகத்தின் கீழ் செயல்படும் பொறியியல் கல்லூரிகளில் சேர, டி.என்.இ.ஏ. (TNEA) பொதுக் கலந்தாய்வு முறையின் மூலம் விண்ணப்பிக்க வேண்டும். மாணவர்களின் கட்-ஆஃப் மதிப்பெண்களின் அடிப்படையில் இடங்கள் ஒதுக்கப்படுகின்றன. 

நான்கு ஆண்டுகள் கொண்ட தொழில்நுட்பப் படிப்பு, இந்தப் படிப்பு நான்கு ஆண்டுகள் காலம் நடைபெறும். ஆரம்ப ஆண்டுகளில் நில அளவை, பொறியியல் மெக்கானிக்ஸ் போன்ற அடிப்படைப் பாடங்கள் கற்பிக்கப்படுகின்றன.அதன் பின்னர் போக்குவரத்து பொறியியல், நெடுஞ்சாலைப் பொறியியல், போக்குவரத்து ஒட்டக் கோட்பாடு, நடைபாதை வடிவமைப்பு மற்றும் போக்குவரத்து மேலாண்மை போன்ற முக்கிய பாடங்கள் கற்பிக்கப்படுகின்றன. மேலும், நகர்ப்புற போக்குவரத்துத் திட்டமிடல், ரயில்வே மற்றும் விமான நிலைய பொறியியல், போக்குவரத்துப் பொருளாதாரம் மற்றும் நிதியியல் போன்ற பாடங்கள் மூலம் மாணவர்களுக்கு தொழில்நுட்ப அறிவுடன் நிர்வாகத் திறனும் வழங்கப்படுகிறது. அரசு மற்றும் தனியார் துறைகளில் வேலைவாய்ப்பு, இத்துறையில் பட்டம் பெறும் மாணவர்களுக்கு அரசு மற்றும் தனியார் துறைகளில் பல்வேறு வேலைவாய்ப்புகள் காத்திருக்கின்றன. 

குறிப்பாக நெடுஞ்சாலைத் துறை, நகர்ப்புற வளர்ச்சித் துறை, பொதுப்பணித் துறை மற்றும் போக்குவரத்துத் திட்டமிடல் வாரியங்களில் முன்னுரிமை அளிக்கப்படுகிறது. தனியார் துறையில் கட்டுமான நிறுவனங்கள், உள்கட்டமைப்பு மேம்பாட்டு நிறுவனங்கள் மற்றும் போக்குவரத்து கன்சல்டன்சி நிறுவனங்களில் பணிபுரிய வாய்ப்பு உள்ளது. திட்ட மேலாளர், போக்குவரத்து வடிவமைப்பாளர், சாலை பாதுகாப்பு தணிக்கையாளர் மற்றும் போக்குவரத்து திட்ட ஆலோசகர் போன்ற பதவிகளில் பணியாற்ற முடியும். பணியமர்த்தும் முன்னணி நிறுவனங்கள், National Highways Authority of India, Indian Railways மற்றும் மாநில சாலைப் போக்குவரத்துக் கழகங்கள் போன்ற அரசு அமைப்புகள் முக்கிய வேலைவாய்ப்பு வழங்குநர்களாக உள்ளன. தனியார் துறையில் Larsen & Toubro, Tata Projects, Afcons Infrastructure, Punj Lloyd போன்ற நிறுவனங்கள் போக்குவரத்து பொறியாளர்களை அதிக அளவில் பணியமர்த்துகின்றன. மேலும், AECOM, Atkins போன்ற பன்னாட்டு கன்சல்டன்சி நிறுவனங்களிலும் வேலைவாய்ப்புகள் அதிகமாக உள்ளன. 

ஆரம்ப நிலையிலேயே கவர்ச்சிகரமான சம்பளம்: இந்தப் படிப்பை முடிக்கும் மாணவர்களுக்கு ஆரம்ப நிலையிலேயே நல்ல சம்பளம் வழங்கப்படுகிறது. இந்தியாவில் புதிய பட்டதாரிகளுக்கு ஆண்டுக்கு சராசரியாக ரூ.3.5 லட்சம் முதல் ரூ.6 லட்சம் வரை ஊதியம் கிடைக்க வாய்ப்புள்ளது. அரசுத் துறையில் பணியில் சேர்ந்தால் அடிப்படைச் சம்பளத்துடன் பல்வேறு சலுகைகள் மற்றும் படிகளும் வழங்கப்படுகின்றன. அனுபவம் மற்றும் முதுநிலைப் பட்டப்படிப்பு பெற்றவர்களுக்கு ஆண்டுக்கு ரூ.10 லட்சம் முதல் ரூ.15 லட்சம் வரை அல்லது அதற்கும் அதிகமாக ஊதியம் கிடைக்கும் வாய்ப்பு உள்ளது. வெளிநாட்டு நிறுவனங்களில் பணிபுரியும் போது இந்த சம்பள அளவு பல மடங்கு அதிகரிக்கும் என கல்வியாளர்கள் தெரிவிக்கின்றனர்.