Lucky The Superstar Review: கலகல வசனம் பேசும் நாய்கள்; படத்தின் பரீட்சார்த்த முயற்சி கைகூடுகிறதா?

தனியார் நிறுவனமொன்றில் பணிபுரியும் தேங்காய் ஸ்ரீனிவாசன் (சுப்பு பஞ்சு) மனைவி (தேவதர்ஷினி), குழந்தையுடன் சென்னையில் வசித்து வருகிறார்.

இவருடைய குழந்தை அம்மு (மேக்னா சுமேஷ்) ஆட்டிசம் குறைபாட்டால் பாதிக்கப்பட்டிருக்கிறார். பிடித்த விஷயங்களுடன் நெருங்கி வளர்வதே அக்குழந்தைக்கான மருந்து என மருத்துவர்கள் கூறிவிட, மாமா லக்ஷ்மணன் (ஜி.வி. பிரகாஷ்) அவரைப் பாசமாகக் கவனித்துக் கொள்கிறார். 

ஒரு நாள் அவருக்கென லக்ஷ்மணன் ஒரு நாய்க்குட்டியையும் வீட்டிற்குக் கொண்டு வருகிறார். அதனுடன் மிகவும் இணக்கமாகிறார் அம்மு. ஆனால், திடீரென ஒரு நாள் அந்த நாயைச் சிலர் கடத்திச் சென்று விடுகிறார்கள்.

சென்டிமெண்ட், ஆக்ஷன், காமெடி என்ற வழக்கமான பாதையில் நமக்கு நன்கு பரிச்சயமான ஜி.வி.பிரகாஷே வந்து போகிறார். ஓரிரு இடங்களில் கட்டுப்பாட்டை மீறி அவிழ்த்துக் கொண்டு ஓடும் செயற்கைத்தனங்களைத் தவிர்த்திருக்கலாம்.

நாயகி அனஸ்வரா ராஜனுக்கு நடிப்பில் குறிப்பிடும்படியான வேலை தரப்படாததால், நம் மனதில் இடம் பிடிக்காமலேயே தப்பி ஓடிவிடுகிறார். சுப்பு பஞ்சு அவருக்கெனத் தைக்கப்பட்ட காமெடி அளவுச்சட்டையை அணிந்திருக்கிறார். ஆனால், சட்டையில் ஜொலிப்பு இல்லை!

கொடுக்கப்பட்ட கதாபாத்திரத்தை தேவதர்ஷினி பொறுப்பாகக் கரைசேர்க்க, குழந்தை நட்சத்திரம் மேக்னா சுமேஷும் நடிப்பில் நல்லதொரு பங்களிப்பைத் தந்திருக்கிறார். 

மேலும், டேனியல் ஆனி போப், ஆடுகளம் நரேன், இளங்கோ குமரவேல், மதுசூதன் ராவ், நமோ நாராயணா ஆகியோருக்கு ஓரிரு காமெடிகளை நிகழ்த்தும் வேலை மட்டுமே கொடுக்கப்பட்டிருக்கிறது.

இவர்களைத் தாண்டி நாய்களுக்குப் பின்னணி குரல் தந்திருக்கும் கோவை சரளா, ‘மொட்டை’ ராஜேந்திரன், தம்பி ராமையா ஆகியோரின் பணி காமெடி என்றாலும் சோதிக்கவே செய்திருக்கிறது.

UK செந்தில்குமார் கேமரா 'டீசன்ட்' சொல்ல வைத்தாலும், இக்காமெடி படைப்பிற்கேற்ற கலர்ஃபுல் டோன் ஒளிப்பதிவில் இல்லாமல் போயிருக்கிறது.

ஓர் இடத்திற்குள்ளேயே மீண்டும் மீண்டும் 'ரிங்கா ரிங்கா ரோஸஸ்' விளையாடும் காட்சிகளைக் கூர்மைப்படுத்தாமல் அப்படியே படத்திற்குள் கோத்திருக்கிறார் படத்தொகுப்பாளர் லாரன்ஸ் கிஷோர்.

சீரான டி.ஐ. கலரிங் இல்லாததும் படத்தின் விஷுவல்களை 'டல்'லாக்கியிருக்கிறது. பாடல் இசையில் ஹேஷம் அப்துல் வஹாப்பும், பின்னணி இசையில் நவ்நீத் சுந்தரும் இந்த டிராமாவிற்குத் தேவையான டச் தராதது மைனஸ்.

ஆங்கிலப் படங்களைப் போல மிருகங்களுக்கு வாயசைவுடன் டப்பிங் செய்திருப்பது கிராபிக்ஸ் ரீதியாக ஓகே என்றாலும், சில காட்சிகளில் இயல்புத்தன்மை மிஸ்ஸிங்!

லக்கி என்ற குட்டி நாயுடன் நெருக்கமாகும் குழந்தை, பெயரைப் போலவே அந்த நாயும் லக்கி என அதனைப் பலரும் சொந்தம் கொண்டாடுவது, அரவணைப்பிலிருந்து நாய் காணாமல் போனதால் கவலை கொள்ளும் அம்மா நாய் எனச் சுவாரஸ்யமான முடிச்சுகளுடனே படத்தைத் தொடங்கியிருக்கிறார் இயக்குநர் உதய் மகேஷ்.

நாய்களுக்கு குரல் கொடுத்து கதாபாத்திரங்களாகத் திரைக்கதைக்குள் கொண்டு வரும் ஐடியா பழசு என்றாலும் அதற்கான அனிமேஷனுக்கு மெனக்கெட்டதற்குப் பாரட்டுகள். ஆனால், அந்தப் பின்னணி குரல்கள் நிகழ்த்தும் காமெடி வசனங்கள் ரொம்ப சுமார் என்பதைத் தாண்டி அதிலும் உருவக் கேலிகளைச் சேர்த்திருப்பது மிகத் தவறு ப்ரோ! 

'லக்கி'யான நாயால் நல்லது நடக்க, அதற்காக அனைவரும் அதை வைத்துக்கொள்ளத் துடிக்க... இது ஒரு சிறுவர் சினிமா என்று நாம் நம்மைத் தயார்ப்படுத்திக்கொண்டாலும் கதாபாத்திர வடிவமைப்பில் அழுத்தமில்லாதது, நம்பகத்தன்மையற்ற வகையில் காட்சிகளை அமைத்திருப்பது ஏமாற்றமே! அதுவும் மாநிலத்தின் முதல்வரை, கவுன்சிலர் ரேஞ்ச் கெடுபிடிகளுடன் காட்டியதெல்லாம் லாஜிக்கே இல்லை பாஸ். 

அதுவும் நாயகன் நாயை மீட்டுக்கொண்டு வரும் படலத்தில் மீண்டும் மீண்டும் ஒரு வட்ட வடிவத்திற்குள்ளாகவே கதை வாக்கிங் செல்வது நம்மை அதீத சோர்வாக்கி பூஸ்ட் கேட்க வைக்கிறது!

தொடக்கப் புள்ளியைச் சுவாரஸ்யமாகப் போடப்பட்டிருந்தாலும், சிறுவர் சினிமாவுக்குத் தேவையான அம்சங்களை லாகவமாகப் பிடிக்கத் தவறியதால், சுமாரான புள்ளிக் கோலமாகவே முடிந்திருக்கிறது இந்த 'லக்கி தி சூப்பர் ஸ்டார்'.