புளிய மரக்கன்றுகளை நட்டு குறுங்காடு - பசுமைப் பரப்பை அதிகரிக்க ஆர்வம் காட்டும் வேலூர் இளைஞர்!

ராணிப்பேட்டை மாவட்டம், கலவை அருகேயுள்ள கீராம்பாடி கிராமத்தில் `குறுங்காடு’ உருவாக்கும் முயற்சியில் ஈடுபட்டிருக்கிறார் இயற்கை தன்னார்வலரும் வேலூரைச் சேர்ந்தவருமான தினேஷ் சரவணன். இதற்காக, ஊராட்சி நிர்வாகம் மூலம் வெட்டவெளி பகுதியை தேர்வுசெய்து, கிராம மக்கள் உதவியுடன் புளிய மரக்கன்றுகளை நடும் பணியைத் தொடங்கியிருக்கிறார் தினேஷ் சரவணன்.

மொத்தமாக 1,000 மரக்கன்றுகளை நட திட்டமிடப்பட்டிருக்கும் நிலையில், முதற்கட்டமாக 100 புளிய மரக்கன்றுகளை நட்டு, அதற்கான தண்ணீர் வசதியையும் ஏற்படுத்தி கொடுத்திருக்கிறார். பூமி பூஜை செய்து இயற்கையை வழிபட்ட பிறகு மரக்கன்றுகளை நடும் பணியை தொடங்கி வைத்த தினேஷ் சரவணன், பசுமைப் பரப்பை அதிகரித்து சுற்றுச்சூழல் சமநிலையைப் பாதுகாக்கவும் தீவிர முயற்சி மேற்கொண்டிருக்கிறார்.