ரோபோட்டிக் துறையில் புதிய மைல்கல்: நெல்லை இளைஞரின் 'டெக்னோவிஷன்' நிறுவனம் சாதனை!

Last Updated:May 12, 2026 12:40 PM IST

மனிதர்களின் கை மற்றும் உடல் அசைவுகளை துல்லியமாக பிரதிபலிக்கும் இந்த ரோபோ, அதிநவீன தொழில்நுட்பத்தின் ஒரு முக்கிய முன்னேற்றமாக பார்க்கப்படுகிறது.

இந்நிறுவனத்தின் தலைமை செயல் அதிகாரி கிர்த்திக் குமார் இது குறித்து பேசுகையில், "எங்கள் நிறுவனம் தொழில்துறை ரோபோக்கள், மனித உருவம் கொண்ட ரோபோக்கள் மற்றும் உணவகங்களில் பணிபுரியும் சர்விங் ரோபோக்கள் என பல்வேறு வகைகளை தயாரித்து வருகிறது. மேலும், விவசாயம் மற்றும் சினிமா துறைகளுக்கான அதிநவீன ட்ரோன்களையும் தயாரித்து வருகிறோம்" என்று தெரிவித்தார்.

தொழில்நுட்பத்தை தயாரிப்பதோடு மட்டுமல்லாமல், எதிர்கால தலைமுறைக்கு அதை கொண்டு சேர்க்கும் வகையில் மாணவர்களுக்கு நேரடி பயிற்சியையும் இந்நிறுவனம் வழங்கி வருகிறது. சமீபத்தில் திருநெல்வேலி மாவட்ட அறிவியல் மையத்தில் நடைபெற்ற தேசிய தின விழாவை முன்னிட்டு, சுமார் 70 மாணவர்களுக்கு ரோபோட்டிக் மற்றும் ட்ரோன்கள் குறித்த ஒரு நாள் இலவச பயிற்சி முகாம் நடத்தப்பட்டது.

பொறியியல் மூன்றாம் ஆண்டு பயிலும் போதே இந்த நிறுவனத்தை தொடங்கியதாக கூறும் கிர்த்திக் குமார், தற்போது 20-க்கும் மேற்பட்ட பணியாளர்களுடன் ஜார்கண்ட், ஹரியானா, மும்பை, பெங்களூரு என இந்தியா முழுவதும் தங்கள் தயாரிப்புகளை விநியோகித்து வருவதாக பெருமிதத்துடன் தெரிவித்தார். விரைவில் சென்னையிலும் புதிய கிளை தொடங்கப்பட உள்ளது.

இந்தியாவிலேயே முதன்முறையாக 24 டிகிரி ஆஃப் ஃப்ரீடம் கொண்ட அதிநவீன 'செமி ஹியூமனாய்டு' ரோபோவை இந்நிறுவனம் உருவாக்கி வருகிறது. இது மனிதர்களின் கை மற்றும் உடல் அசைவுகளை துல்லியமாக பிரதிபலிக்கும் திறன் கொண்டது. வருங்காலத்தில் முழுமையான மனித உருவம் கொண்ட, தானாகவே நடக்கும் திறன் பெற்ற ரோபோக்களை உருவாக்குவதே இவர்களின் அடுத்த இலக்காகும். நெல்லையில் இருந்து உலகத்தரம் வாய்ந்த தொழில்நுட்பங்களை உருவாக்கி வரும் இந்த இளைஞரின் முயற்சி பலரது பாராட்டுகளை பெற்று வருகிறது.

உங்கள் ஊர் செய்திகளை வீடியோவாக பெற கிளிக் செய்க

Location :

Tirunelveli,Tirunelveli,Tamil Nadu

First Published :