9 மாதங்களுக்கு பிறகு மீண்டும் ஆக்ரோஷத்தை காட்டிய காட்டு யானை..

குறிப்பாக, பகல், இரவு பேதமின்றி யானைகள் கூட்டம் கூட்டமாக சுற்றித் திரிவதை காண முடியும். யானைகள் நடமாட்டம் அதிகம் உள்ளதால் வால்பாறை மற்றும் அதை சுற்றியுள்ள தேயிலை விலங்குகள் குறித்து உள்ளூர ஓர் அச்சம் இருந்த கொண்டே இருப்பதாக கூறப்படுகிறது. அண்மைக் காலமாக உணவு தேடி அழையும் யானைகள் வீடுகள் மற்றும் ரேஷன் கடைகளை உடைத்து பொருட்களை சேதப்படுத்துவதும் தொடர் கதையாகியுள்ளது.

இந்த நிலையில் வால்பாறை வாட்டர் பால்ஸ் எஸ்டேட் அருகே ஊமையாண்டி முடக்கு பகுதியில் ஒற்றை யானை இரவில் நடமாடியுள்ளது. அதிகாலை 3 மணியளவில் குடியிருப்புக்குள் நடமாடிய அந்த யானை, மாரிமுத்து என்பவரின் வீட்டு பகுதிக்கு சென்றுள்ளது. அப்போது, ஜன்னல் தடுப்புக்காக வைத்திருந்த ஓட்டை இடித்து தள்ளி தலையை உள்ளே விட்டுள்ளது. தொடர்ந்து தும்பிக்கையால் வீட்டிற்குள் ஏதேனும் உள்ளதா என தேடியுள்ளது. உள்ளே அயர்ந்து தூக்கிக் கொண்டிருந்தவர்கள் ஜன்னல் வழியாக யானை தலையை விட்டதை கண்டு அதிர்ச்சியில் உறைந்து போயுள்ளனர்.

உடனே, அசலா, தனது 3 வயது பேத்தி ஹேமாஸ்ரீயை தூக்கிக் கொண்டு வாசல் பகுதிக்கு சென்றுள்ளார். திடீரென ஆக்ரோஷமான யானை வாசல் பகுதியில் இருந்த அசலாவை தாக்கியுதுடன், அவர் கையில் இருந்து கீழே விழுந்த குழந்தையின் தலைப் பகுதியில் மிதித்துள்ளது. அதைக் கண்டு அங்கிருந்த குழந்தையின் தாய் உள்ளிட்ட மற்ற பெண்கள் கத்தி கூச்சலிட்டதும யானை அங்கிருந்து கிளம்பியுள்ளது. யானை மிதித்ததில், தூக்க நிலையில் இருந்த பிஞ்சுக் குழந்தை நிகழ்விடத்திலேயே பரிதாபமாக உயிரிழந்தது.

படுகாயமடைந்த அசலாவை, அருகில் இருந்தவர்கள் மீட்டு வால்பாறை மருத்துவமனைக்கு கொண்டு சென்றனர். அங்கு பரிசோரித்த மருத்துவர்கள் அவர் வரும் வழியிலேயே உயிரிழந்து விட்டதாக கூறியுள்ளனர். தகவல் அறிந்து வந்த வனத்துறையினர் மற்றும் போலீசார் இருவரின் உடல்களையும் கைப்பற்றி உடற்கூராய்வுக்காக வால்பாறை அரசு மருத்துவமனையில் உள்ள பிணவறைக்கு அனுப்பி வைத்தனர்.