“டி.ஆர். பாலு மீது நாளை புதிய அவதூறு வழக்கு தொடருவேன்” – அண்ணாமலை பரபரப்பு அறிவிப்பு

வழக்கு விசாரணை முடிந்து வெளியேவந்த அண்ணாமலை செய்தியாளர்களைச் சந்தித்தார். அப்போது அவர் கூறியதாவது; “என் மனைவியின் பெயரில் சொத்து வாங்கியிருப்பதாக புதிய அவதூறை அவர் சொல்லியுள்ளார். அப்போது, என் மனைவி எங்கே படித்தார், பணியாற்றுகிறாரா, எங்கு பணியாற்றுகிறார்? சொத்து வாங்கப்பட்டது எப்படி உள்ளிட்ட கேள்விகளை கேட்டேன். ஆனால் அதற்கு எந்தப் பதிலும் அவர் கூறவில்லை. எனவே நாளை டி.ஆர். பாலு மீது புதிதாக ஒரு அவதூறு வழக்கை தொடர இருக்கிறோம்.

கட்சி பொறுப்பாகவே நான் சென்னையில் குடியேறினேன். கட்சி சார்பாக என் நண்பர்கள் வழங்கிய பணத்தை நான் வாடகைக்காக கொடுத்தேன். இது எல்லாவற்றையும் நான் அவர் கூறிய அவதூறு வழக்கில் சுட்டிக்காட்ட போகிறேன்.

நான் வாங்கிய விவசாய நிலம் எப்படி வாங்கப்பட்டது என்பது பொது தளத்தில் உள்ளது. நேர்மையான அரசியல்வாதியாக இருக்க வேண்டும் என்று நினைக்கும் நான், கடினமான பாதையில் பயணித்து தான் ஆக வேண்டும்.

நடிகை திரிஷா குறித்து பாஜகவினுடைய அகில இந்திய மகளிர் அணி தலைவர் வானதி சீனிவாசன் கூறிய கருத்து கட்சியினுடைய கருத்தாக நான் பார்க்கிறேன். அவர் வருத்தம் தெரிவித்துள்ளார் அதற்கு மேல் கருத்து தெரிவிக்க விரும்பவில்லை.