நிலக்கரியால் ஏற்படும் மாசு உலகளாவிய சூரிய ஆற்றல் உற்பத்தியைப் பாதிக்கிறது

லண்டன்: சூரிய ஒளியைத் தடுக்கக்கூடிய நிலக்கரி மின் உற்பத்தி நிலையங்களிலிருந்து வரும் மாசு, உலகளாவிய சூரிய ஆற்றல் உற்பத்தியைக் கணிசமாகக் குறைப்பதாகவும் மேலும் பருவநிலை முன்னேற்றத்தை மிகையாக மதிப்பிடுவதற்கு வழிவகுக்கக்கூடும் என்றும் ஒரு புதிய ஆய்வு கூறுகிறது.

புதைபடிவ எரிபொருள்களை எரிப்பதாலும், எரிமலைகள் போன்ற இயற்கை மூலங்களிலிருந்தும் வெளியிடப்படும் நுண்ணிய வாயுத் துகள்களான ஏரோசோல்கள், 2023ஆம் ஆண்டில் உலகளாவிய சூரிய ஆற்றல் உற்பத்தியை 5.8 விழுக்காடு குறைத்துள்ளன என்று ஆக்ஸ்போர்டு பல்கலைக்கழகம் மற்றும் லண்டன் பல்கலைக்கழகக் கல்லூரியைச் சேர்ந்த ஆராய்ச்சியாளர்கள், வெள்ளிக்கிழமையன்று (மே 15) ‘நேச்சர் சஸ்டெய்னபிலிட்டி’ இதழில் வெளியிடப்பட்ட ஓர் ஆய்வில் தெரிவித்துள்ளனர்.

இது சுமார் 111 டெராவாட்-மணிநேர மின்சாரத்திற்குச் சமமாகும். இது 18 நடுத்தர அளவிலான நிலக்கரி ஆலைகளின் ஆண்டு மின் உற்பத்திக்கு இணையானது.

சூரிய மின் நிலையங்கள் நிலக்கரி ஆலைகளுக்கு அருகில் அமைந்திருக்கும்போது இதன் விளைவு மிகவும் அதிகமாகக் காணப்படுகிறது.

உலகின் மிகப்பெரிய சூரிய சக்தி மற்றும் நிலக்கரி உற்பத்தியாளரான சீனாவில், காற்றில் பரவும் துகள்கள் ஒளிமின்னழுத்த உற்பத்தியை 7.7 விழுக்காடு குறைத்துள்ளன. இந்த வீழ்ச்சியில் கிட்டத்தட்ட மூன்றில் ஒரு பங்கிற்கு நிலக்கரி மின் நிலையங்களே காரணம் என்று விஞ்ஞானிகள் கூறுகின்றனர்.

இந்தியா, அமெரிக்கா, ஜப்பான் ஆகிய நாடுகளிலும் காற்றில் பரவும் துகள்கள் சூரிய மின் உற்பத்தியைக் குறைத்துள்ளன.

“மக்கள் ஆற்றல் மாற்றத்திற்கான கணிப்புகளைச் செய்யும்போது, ​​அவர்கள் சூரிய மின்சார உற்பத்தியை மதிப்பிட்டு, அதை நேரடியாக பருவநிலை நன்மைகள் அல்லது தவிர்க்கப்பட்ட புவி வெப்பமயமாதலாக மாற்றுகிறார்கள்,” என்று இந்த அறிக்கையின் முதன்மை ஆசிரியரும் ஆக்ஸ்போர்டு முனைவர் பட்டத்திற்குப் பிந்தைய ஆய்வாளருமான ரூய் சாங் கூறினார்.

“நிலக்கரி மின் உற்பத்தியால் ஏற்படும் மாசை நாம் கட்டுப்படுத்தாவிட்டால், சூரிய ஆற்றலால் கிடைக்கும் காலநிலை நன்மைகளை நாம் மிகையாக மதிப்பிடும் அபாயம் உள்ளது என்பதை எங்கள் ஆய்வு காட்டுகிறது,” என்றும் அவர் கூறினார்.

“மேலும், நிலக்கரி மின் நிலையங்களுக்கு அருகில் சூரிய மின் பண்ணைகளை அமைப்பதன் செயல்பாட்டு நன்மைகள், அதாவது, மின் கட்டமைப்பு இணைப்புகள் மற்றும் அதிக திறன் கொண்ட மின் செலுத்துத் தடங்களில் விரைவாக இணைவதற்கு வழிவகுக்கும் நன்மைகள் ஆகியவை ஒரு சாதகமில்லா அம்சத்தையும் கொண்டுள்ளன என்றும் அது சூரிய ஆற்றல் திறனைக் கணிசமாகக் குறைக்கக்கூடும் என்றும் இந்த ஆய்வின் முடிவுகள் சுட்டிக்காட்டுகின்றன.