Toyota : இந்தியாவில் புது கெட்டப்பில் மாஸ் எண்ட்ரி கொடுக்கும் டொயோட்டா ஹிலக்ஸ் - விலை எவ்வளவு தெரியுமா?

புதிய ஹிலக்ஸிலும் தற்போதைய 2.8 லிட்டர் டீசல் இன்ஜினே தொடரும் என்று தெரிகிறது. இந்த இன்ஜின் 201 bhp பவரையும், 500 Nm டார்க்கையும் உற்பத்தி செய்யும் திறன் கொண்டது. கியர்பாக்ஸ் ஆப்ஷன்களாக 6-ஸ்பீடு மேனுவல் மற்றும் டார்க் கன்வெர்ட்டர் ஆட்டோமேட்டிக் டிரான்ஸ்மிஷன் ஆகியவை தொடரும். இதுதவிர, சிறந்த மைலேஜ் மற்றும் மென்மையான ஓட்டுதல் அனுபவத்திற்காக 48-வோல்ட் மைல்ட்-ஹைப்ரிட் தொழில்நுட்பத்தையும் நிறுவனம் அறிமுகப்படுத்தலாம். இந்தத் தொழில்நுட்பம் ஏற்கெனவே டொயோட்டா ஃபார்ச்சூனர் காரில் உள்ளது குறிப்பிடத்தக்கது.

எதிர்பார்க்கப்படும் விலை

அடுத்த தலைமுறை டொயோட்டா ஹிலக்ஸின் விலை சுமார் ₹36 லட்சம் முதல் ₹46 லட்சம் வரை (எக்ஸ்-ஷோரூம், மும்பை) இருக்கலாம் என எதிர்பார்க்கப்படுகிறது. ஹிலக்ஸைத் தொடர்ந்து, 2026-ன் இறுதியிலோ அல்லது 2027-ன் தொடக்கத்திலோ அடுத்த தலைமுறை ஃபார்ச்சூனரை இந்தியாவில் அறிமுகப்படுத்த டொயோட்டா திட்டமிட்டுள்ளதாகக் கூறப்படுகிறது. அசத்தலான ஆஃப்-ரோடு திறன், பிரீமியம் வசதிகள் மற்றும் உறுதியான கட்டமைப்பு ஆகியவற்றை விரும்பும் வாடிக்கையாளர்களுக்கு புதிய ஹிலக்ஸ் ஒரு சிறந்த தேர்வாக அமையும்.

லேண்ட் குரூஸர் FJ, பிராடோவும் இந்தியாவிற்கு வருகிறது

டொயோட்டாவின் எதிர்காலத் திட்டங்களில் லேண்ட் குரூஸர் FJ-க்கும் முக்கிய இடம் உள்ளது. IMV 0 லேடர் ஃபிரேம் பிளாட்ஃபார்மில் உருவாக்கப்படும் இந்த எஸ்யூவி, சக்திவாய்ந்த 2.8 லிட்டர் டீசல் இன்ஜின் மற்றும் 6-ஸ்பீடு ஆட்டோமேட்டிக் டிரான்ஸ்மிஷனுடன் வரும் என எதிர்பார்க்கப்படுகிறது. இந்த வாகனம் 2028-ம் ஆண்டுக்குள் இந்தியாவில் அறிமுகம் செய்யப்படலாம்.

அதே சமயம், பிரீமியம் எஸ்யூவி பிரிவில் லேண்ட் குரூஸர் பிராடோவை இந்தியாவிற்குக் கொண்டு வருவது குறித்தும் டொயோட்டா ஆலோசித்து வருகிறது. தற்போதைய லேண்ட் குரூஸர் 300 மாடலுக்குக் கீழ் பிராடோ நிலைநிறுத்தப்படும். சக்திவாய்ந்த பெட்ரோல், டீசல் இன்ஜின்களுடன் ஸ்டாண்டர்டாக ஃபோர்-வீல் டிரைவ் சிஸ்டமும் இதில் கிடைக்கும். புதிய ஹிலக்ஸ் மற்றும் எதிர்கால ஃபார்ச்சூனர், லேண்ட் குரூஸர் மாடல்கள் மூலம், இந்திய பிரீமியம் எஸ்யூவி மற்றும் ஆஃப்-ரோடு வாகனச் சந்தையில் தனது ஆதிக்கத்தை வலுப்படுத்த டொயோட்டா இலக்கு வைத்துள்ளது.